Սկանդինավյան երկրների (Դանիա, Նորվեգիա, Շվեդիա և Ֆինլանդիա) սպառողները կոչ են անում ապահովել ավելի մեծ թափանցիկություն, ընտրության հնարավորություն և ստեղծագործողների իրավունքների պաշտպանություն, քանի որ արհեստական բանականությունն ավելի ու ավելի է ներթափանցում առօրյա կյանք։

CISAC-ի անդամ KODA, TONO և Teosto կազմակերպությունների պատվերով YouGov-ի իրականացրած «Թվային երաժշտությունը Սկանդինավյայում» նոր հետազոտությունը ցույց է տալիս, որ սկանդինավյան երկրներում արհեստական բանականության օգտագործումը ընդամենը երկու տարվա ընթացքում ավելի քան եռապատկվել է՝ 2024 թվականի 20%-ից հասնելով 2026 թվականի 66%-ի։

Արհեստական բանականության կիրառման աճին զուգահեռ՝ հետազոտությունը միաժամանակ ցույց է տալիս, թե ինչպես են սկանդինավյան երկրների սպառողները վերաբերվում դրա դերակատարությանը երաժշտության ոլորտում։

- 77%-ը կարծում է, որ առանց մարդու ստեղծագործական մասնակցության ստեղծված երաժշտությունը պետք է հստակ մատնանշվի երաժշտության հոսքային ծառայություններում և ռադիոյում։ 2024 թվականին այս ցուցանիշը 58% էր։

- 74%-ը ցանկանում է հնարավորություն ունենալ հեռացնելու արհեստական բանականությամբ ստեղծված երաժշտությունը երգացանկերից։

- 77%-ը կարծում է, որ կոմպոզիտորներն ու երգահանները պետք է որոշեն՝ արդյոք իրենց երաժշտությունն օգտագործվի արհեստական բանականության ծառայությունների ուսուցման նպատակով։

- 74%-ը կարծում է, որ ստեղծագործողները պետք է վարձատրվեն, երբ արհեստական բանականության ընկերություններն օգտագործում են նրանց երաժշտությունը կամ ձայնը՝ նոր բովանդակություն ստեղծելու համար։

Հետազոտության արդյունքներն ընդգծում են սպառողների հստակ ակնկալիքները՝ կապված թափանցիկության, վերահսկողության, համաձայնության և փոխհատուցման հետ, քանի որ արհեստական բանականությունն այսօր ավելի լայն կիրառություն է ստանում աշխարհում։